ТАВАН ТОЛГОЙ – ГАШУУНСУХАЙТ ЧИГЛЭЛИЙН АВТОЗАМЫН ҮЙЛ АЖИЛЛАГААГ ДЭМЖИХ ЗОРИЛГООР ЗАСГИЙН ГАЗРЫН ШИЙДВЭРИЙГ ҮНДЭСЛЭН ЦАГДААГИЙН БИЕ БҮРЭЛДЭХҮҮНД АВТОМАШИН ХҮЛЭЭЛГЭН ӨГЛӨӨ 2017 оны 6 сарын 9

     “Эрдэнэс Монгол” ХХК-ийн зүгээс Таван толгой - Гашуунсухайт чиглэлийн автозамд үүрэг гүйцэтгэж буй цагдаагийн бие бүрэлдэхүүн, “Гашуунсухайт авто зам”ХХК-д  замын хөдөлгөөний аюулгүй байдлыг хангах, осол зөрчлөөс урьдчилан сэргийлэх, тээврийн хэрэгслийг боомтоор нэвтрүүлэх хүчин чадлыг нэмэгдүүлэх ажлын хэрэгцээнд “Land Cruiser-76”, “Land Cruiser-78” маркийн шинэ авто машинуудын түлхүүрийг, алд цэнхэр хадгийн хамт  “Эрдэнэс Монгол”ХХК-ийн бизнес хөгжлийн дэд захирал О.Одбаяр хүлээлгэн өглөө.

         Дэд захирал О.Одбаяр хэлсэн үгэндээ таван толгойн бүс нутгаас өнгөрсөн жил 12.8 сая тонн, оны эхний 5 сард 10.6 сая тонн нүүрсийг Таван толгой - Гашуунсухайт чиглэлийн авто замаар тээвэрлэж, тус зам дээр 6000 гаран автомашин өдөр шөнөгүй явж байна. Монгол Улсын ачаа тээврийн экспортын дийлэнх хувийг Таван толгой-Гашуунсухайт чиглэлийн автозамаар тээвэрлэж, Монгол Улсын эдийн засагт  жинтэй хувь нэмэр оруулж байгаа талаар онцолж, цаашид энэ замын засвар арчлалт, нэвтрүүлэх хүчин чадлыг нэмэгдүүлэх тал дээр онцгой анхаарал тавьж ажиллана гээд  тус зам дээр үүрэг гүйцэтгэж буй ажилтан, албан хаагчдад талархал илэрхийлж, ажилд нь амжилт хүслээ.

         Уг арга хэмжээнд “Эрдэнэс Монгол” ХХК-ийн бизнес хөгжлийн дэд захирал О.Одбаяр, Цагдаагийн ерөнхий газрын тэргүүн дэд дарга, Тэргүүн дэд комиссар П.Батбаатар, Хангамжийн хэлтсийн дарга, цагдаагийн хурандаа Д.Мөнхбаатар “Гашуун Сухайт авто зам” ХХК-ийн гүйцэтгэх захирал Ц.Болд, нар болон бусад алба хаагчид оролцлоо.

Холбоо барих

Монгол Улс, Улаанбаатар хот 14240
Сүхбаатар дүүрэг 1-р хороо, Чингисийн өргөн чөлөө-15, 15 давхар
+976 75553399
info@erdenesmongol.mn

Байрлал